Payakumbuh, --- Baru sajo suda mandanga kaji tabligh akbar di Masojik Baiturrahman kelurahan Ompang Tanah Sirah (OTS) jo Buya H. Hanan Putra Lc, MA, jemaah masojik taruih pulang ke rumah surang - surang. Balain jo jemaah nan barasa dari kalompok gurau di kodai kopi Fitrial (Si Fit) RW II Balai Botuang, karojo bauleh jo makan basamo di ateh daun pisang.
Karojo iko tasobuk tasosak sajo, salain kalompok gurau, anggota warkop Si Fit banyak nan suko mangayia, kirinyo alah barancana jo manyiapkan ikan sajak Salasa, (31/12/2019) pagi. Ikan itula nan dimasak malam ujuang 2019, ko.
"Salain untuak silaturahim, Makan basamo iko sabagai wujud syukur Bapadi Baru (siap panen) kapado Allah SWT malalui jamuan makan secaro sederhana. 2 gantang bore ditanak jadi nasi, dimakan basamo. Samba barasa dari ikan nan bakayia cako. Ditamba ikan asin, digoreng masiak dek rang rumah ambo (Misnati). Ndak lupo samba lado potai, "sobuk Si Fit, Salasa (31/12/2019) jalang tongah malam.
Wakotu nan ditunggu lah tibo, makan basamo di ateh daun pisang, ditabua. Sekiro 15 urang sato bagodang makan jo daun samba ikan asin, malam tu. Makan basamo diringi dendang logu saluang klasik.
Nan sato makan indak sajo urang Balai Botuang, kelurahan Ompang Tanah Sirah, tapi ado pulo urang palopau dari tetangga Balai Botuang, yaitunyo dari jorong Padang Rantang kecamatan Harau. Sabagaian ado nan ndak hadir dek ari ujan.
"Tarimo Kasi ateh jamuannyo, semoga rasoki ditamba Allah. Dan kok dapek wak ulang baliak isuaknyo,"kecek Efrizal Pandan.
"Dari pado awak malala, rancak kito ngumpua disiko sambia silaturahim. Taun baru apo tu, samo jom nyo nyeh, 24 jom. Dari pado kito bacarito jo mandanga politik nan mangicuah. Bia sajolah, apo nan katuju dek urang tu sajolah. Awak lo nan poniang dek urang tu, "tamba Ijon.
"Insya Allah, malam balimau kito ulang liak, "pungkas Si Fit.(014)
